Tweet

رفض عدد كبير من المواطنين دفع فواتير الكهرباء احتجاجًا على انقطاعها بشكل متتال، بات يصل لـ8 مرات يومياً في بعض من المناطق.
جاءت تلك الخطوة في ظل تصاعد الدعوات المتصاعدة من بعض الائتلافات والحملات، مثل "ائتلاف معدومي الدخل والعاطلين"، وحملة "مش دافعين" على فيس بوك، لعدم دفع الفواتير كخطوة تصعيدية للضغط على الحكومة المصرية لسرعة حل الأزمة.
وقال محمد حنفي أحد المواطنين: "احنا مش هندفع فواتير الكهرباء خالص، لأننا مش مستفيدين من الكهرباء ومصالحنا وأشغالنا اتأثرت بشكل كبير بسبب انقطاع التيار الكهربائى، فين المنفعة اللى احنا بنحصل عليها علشان ندفع فواتير الكهرباء، لما تتوافر الكهرباء بشكل مستمر ساعتها نبقى ندفع الفواتير، محدش يقبل اللي احنا فيه".
من جانبها، قالت هوايدا حسين موظفة بمصلحة الضرائب: "المفروض محدش يدفع فواتير الكهرباء بسبب الغلاء اللى احنا فيه وقطع النور والمياه المستمر اللي بهدلنا"، وفقا لموقع مصر العربية.
وتابعت: "المفروض كل الناس تتكاتف مع بعضها وتبطل تدفع الفواتير لحد ما يتعدل النور والحال يتصلح"، موضحة أنها تقطن في القاهرة الجديدة، وتعاني انقطاع التيار الكهربائي 3 مرات يومياً.
من جهته، قال محمد إسماعيل صاحب صالون حلاقة: "مش مقبول إن الكهرباء تقطع أكثر من ساعة في اليوم، أنا ساكن في دار السلام والكهرباء بتقطع 7 و8 مرات في اليوم علشان كده مش هدفع فاتورة الكهرباء"، مشيرة إلى ارتفاع سعر الكهرباء رغم كثرة انقطاعها وقلة الانتفاع منها.
بدوره، قال مجدي محمود: "احنا غصب عننا بندفع الفواتير وكمان بندفعها غالية لا تتناسب مع انقطاع التيار الكهربائى المتواصل"، متهمًا شركة الكهرباء بسرقة المواطنين واستنزافهم، وأضاف: "المشكلة إننا لو مدفعناش هينزلنا موظفين من شركة الكهرباء يهددونا بقطع الكهرباء فهندفع غصب عننا".
وقال علي مصطفى، بائع جرائد بالشارع: "مش هدفع طبعًا فاتورة الكهرباء لأني ما بستهلكش أصلاً اللي بدفعه في الفاتورة، لأن النور بيقطع كل شوية"، وطالب الحكومة قبل مطالبتها المواطنين بسداد الفواتير، بتقديم خدمة جيدة تستحق الدفع وبذلك تحصل الدولة على حقها وفي المقابل يأخذ المواطن حقه.
وأخيرًا قال عبدالعال مجاهد، صاحب بقالة: "أنا مش هدفع فاتورة الكهرباء لا الشهر دا ولا الشهر اللى بعده لحد ما تيجى الكهرباء، لأنها بتقطع 6 ساعات في اليوم، أنا بدفع ضرائب وتأمينات وفواتير كهربا وميّه ونور".
واختتم مجاهد: "لما النور بيقطع مش بلاقي زبون واحد فهدفع فاتورة ليه"؟.